సంక్షిప్తసూచీ:
(తై-ఆ) - తైత్తిరీయ-ఆరణ్యక
(తై-సం) - తైత్తిరీయ-సంహితా
(తై-బ్రా) - తైత్తిరీయ-బ్రాహ్మణం
శ్రీః || (అగ్రే సర్వత్ర ప్రతికలశం మంత్రావృత్తిరుత్తరసంస్థతా చ) కర్తా స్వపురతః ||
మ॒హీ ద్యౌః పృ॑థి॒వీ చ॑ న ఇ॒మం య॒జ్ఞం మి॑మిక్షతాం । పి॒పృ॒తాం నో॒ భరీ᳚మభిః ||
ఇతి మంత్రావృత్యా దక్షిణోత్తరతో భూమిం స్పృష్ట్వా |
ఓష॑ధయః॒ సం వ॑దంతే॒ సోమే᳚న స॒హ రాజ్ఞా᳚ । యస్మై᳚ కృ॒ణోతి॑ బ్రాహ్మ॒ణస్తం రా᳚జన్ పారయామసి || ఇతి తథైవ తండులపుంజౌ కృత్వా |
ఆ క॒లశే᳚షు ధావతి ప॒విత్రే॒ పరి॑ షిచ్యతే । ఉ॒క్థైర్య॒జ్ఞేషు॑ వర్ధతే || ఇతి తత్ర ద్వౌ కలశౌ నిధాయ ||
ఇ॒మం మే᳚ గంగే యమునే సరస్వతి॒ శుతు॑ద్రి॒ స్తోమం᳚ సచతా॒ పరు॒ష్ణ్యా । అ॒సి॒క్న్యా మ॑రుద్వృధే వి॒తస్త॒యాఽఽర్జీ᳚కీయే శృణు॒హ్యా సు॒షోమ॑యా || ఇతి తీర్థజలేన ప్రత్యేకం పూరయిత్వా ||
గన్ధ॑ద్వా॒రాన్దు॑రాధ॒ర్షా న్నిత్య॑పుష్టాఙ్కరీ॒షిణీ᳚మ్। ఈ॒శ్వరీం᳚ సర్వ॑భూతా॒నా॒ న్తామి॒హోప॑ హ్వయే॒ శ్రియ᳚మ్||
ఇతి గంధం నిక్షిప్య ||
(తై-ఆ) కాండా᳚త్కాండాత్ప్ర॒రోహం॑తీ॒ పరు॑షఃపరుషః॒ పరి॑ | ఏ॒వా నో॑ దూర్వే॒ ప్రత॑ను స॒హస్రే॑ణ శ॒తేన॑ చ ।| ఇతి దూర్వాః ||
అ॒శ్వ॒త్థే వో᳚ ని॒షద॑నం ప॒ర్ణే వో᳚ వస॒తిష్కృ॒తా । గో॒భాజ॒ ఇత్కిలా᳚సథ॒ యత్స॒నవ॑థ॒ పూరు॑షం || ఇతి పల్లవాన్ ||
యాః ఫ॒లినీ॒ర్యా, అ॑ఫ॒లా, అ॑పు॒ష్పా యాశ్చ॑ పు॒ష్పిణీః᳚ । బృహ॒స్పతి॑ప్రసూతా॒స్తా నో᳚ ముంచం॒త్వంహ॑సః || ఇతి ఫలం ||
స హి రత్నా᳚ని దా॒శుషే᳚ సు॒వాతి॑ సవి॒తా భగః॑ । తం భా॒గం చి॒త్రమీ᳚మహే || ఇతి రత్నాని ||
హిర᳚ణ్యరూపః॒ స హిర᳚ణ్యసందృగ॒పాం నపా॒త్ సేదు॒ హిర᳚ణ్యవర్ణః । హి॒ర॒ణ్యయా॒త్ పరి॒ యోనే᳚ర్ని॒షద్యా᳚ హిరణ్య॒దా ద॑ద॒త్యన్న॑మస్మై || ఇతి హిరణ్యం
యువా᳚ సు॒వాసాః॒ పరి॑వీత॒ ఆగా॒త్ స ఉ॒ శ్రేయా᳚న్ భవతి॒ జాయ॑మానః । తం ధీరా᳚సః క॒వయ॒ ఉన్న॑యంతి స్వా॒ధ్యో॒3॑(ఓ॒) మన॑సా దేవ॒యంతః॑ || ఇతి వస్త్రం |
(తై-సం) పూ॒ర్ణా ద॑ర్వి॒ పరా॑ పత॒ సుపూ᳚ర్ణా॒ పున॒రాప॑త | వ॒స్నేవ॒ వి క్రీ॑ణావహా॒ ఇష॒మూర్జꣳ॑ శతక్రతో ||
ఇతి స తండులాభ్యాం పూర్ణపాత్రాభ్యాం కలశయోరాననే పిదధ్యాత్ ||
తత్త్వా᳚ యామి॒ బ్రహ్మ॑ణా॒ వంద॑మాన॒స్తదా శా᳚స్తే॒ యజ॑మానో హ॒విర్భిః॑ । అహే᳚ళమానో వరుణే॒హ బో॒ధ్యురు॑శంస॒ మా న॒ ఆయుః॒ ప్ర మో᳚షీః ||
కలశే వరుణం సాంగం సాయుధం సపరివారం సాయుధం సశక్తికమావాహయామి || ఓం భూర్భువఃస్వః వరుణాయనమః చందనం సమర్పయామి || ఇత్యాది పంచోపచారైస్సంపూజ్య || తత్త్వాయామీతి పుష్పాంజలిం సమర్ప్య || అనేన పూజనేన వరుణః ప్రీయతాం ||
కలశస్య ముఖే విష్ణుః కంఠే రుద్రస్సమాశ్రితః | మూలే తత్ర స్థితో బ్రహ్మా మధ్యే మాతృగణాః స్మృతాః | కుక్షౌతు సాగరాస్సర్వే సప్తద్వీపావసుంధరా । ఋగ్వేదో ౽థయజుర్వేదస్సామవేదోహ్యథర్వణః అంగైశ్చ సహితాస్సర్వే కలశాంబుసమాశ్రితాః || అత్ర గాయత్రీ సావిత్రీ శాంతిపుష్టికరీ తథా | ఆయాంతు మమ శాంత్యర్థం దురితక్షయకారకాః || సర్వేసముద్రాః సరితస్తీర్థాని జలదానదాః | ఆయాంతు మమ శాంత్యర్థం దురితక్షయకారకాః ||
ఉత్తరకలశే అక్షతాంక్షిపేత్ || మాతృదేవోభవ | పితృదేవోభవ | ఆచార్యదేవోభవ | అతిథి దేవో భవ | సర్వేభ్యో బ్రాహ్మణేభ్యో నమో నమః ||
తతో అవనీకృత జానుమండలః కమలముకులసదృశమంజలిం శిరస్యాధాయ
దక్షిణేన పాణినా సువర్ణ (స్వర్ణ) పూర్ణకలశం ధారయిత్వా ఆశిషః ప్రార్థయతే ||
ప్రార్థనామాహ ।
ఏతాః సత్యా ఆశిషః సంతు | దీర్ఘా నాగా నద్యో గిరయస్త్రీణి విష్ణుపదాని చ । తేనాయుః ప్రమాణేన పుణ్యాహం దీర్ఘమాయురస్తు |
బ్రాహ్మణహస్తే ।
శివాః ఆపః సంతు | సౌమనస్యమస్తు | అక్షతంచారిష్టంచాస్తు | గంధాః పాంతు1 | సౌమంగల్యం చాస్తు । అక్షతాః పాంతు | ఆయుష్యమస్తు । పుష్పాణిపాంతు | సౌశ్రియమస్తు। తాంబూలాని పాంతు | ఐశ్వర్యమస్తు | దక్షిణాఃపాంతు | బహుదేయం చాస్తు । దీర్ఘమాయుః శ్రేయః శాంతిః పుష్టిస్తుష్టిశ్చాస్తు । శ్రీర్యశో విద్యా వినయో విత్తం బహుపుత్రం చాయుష్యం చాస్తు2
(1అత్ర గంధాః పాంత్విత్యాదిభిర్మంత్ర పూర్వార్ధైర్యుగ్మాన్ర్బాహ్మణాన్గంధాదినా పూజయేత్ | తే చ సౌమంగల్యంచాస్త్వితి మంత్రోత్తరార్ధాని ప్రతిబ్రూయుః | 2బ్రాహ్మణైరస్త్వితి సర్వత్ర |)
యంకృత్వా సర్వవేద యజ్ఞ క్రియాకరణ కర్మారంభాః శుభాః శ్శోభనాః ప్రవర్తంతే తమహమోంకారమాదింకృత్వా ఋగ్యజుఃసామాశీర్వచనం బహ్యృషిమతం సంవిజ్ఞాతం భవద్భిరనుజ్ఞాతః పుణ్యం పుణ్యాహం వాచయిష్యే ||
విప్రాః వాచ్యతామ్ || తతో యజమానః ||
భ॒ద్రం కర్ణే᳚భిః శృణుయామ దేవా భ॒ద్రం ప॑శ్యేమా॒క్షభి᳚ర్యజత్రాః । స్థి॒రైరంగై᳚స్తుష్టు॒వాంస॑స్త॒నూభి॒ర్వ్య॑శేమ దే॒వహి॑తం॒ యదాయుః॑ ||
ద్ర॒వి॒ణో॒దా ద్రవి॑ణసస్తు॒రస్య॑ ద్రవిణో॒దాః సన॑రస్య॒ ప్ర యం᳚సత్ । ద్ర॒వి॒ణో॒దా వీ॒రవ॑తీ॒మిషం᳚ నో ద్రవిణో॒దా రా᳚సతే దీ॒ర్ఘమాయుః॑ ||
స॒వి॒తా ప॒శ్చాతా᳚త్సవి॒తా పు॒రస్తా᳚త్సవి॒తోత్త॒రాత్తా᳚త్సవి॒తాధ॒రాత్తా᳚త్ । స॒వి॒తా నః॑ సువతు స॒ర్వతా᳚తిం సవి॒తా నో᳚ రాసతాం దీ॒ర్ఘమాయుః॑ ||
నవో᳚నవో భవతి॒ జాయ॑మా॒నోఽహ్నాం᳚ కే॒తురు॒షసా᳚మే॒త్యగ్రం᳚ । భా॒గం దే॒వేభ్యో॒ వి ద॑ధాత్యా॒యన్ ప్ర చం॒ద్రమా᳚స్తిరతే దీ॒ర్ఘమాయుః॑ ||
ఉ॒చ్చా ది॒వి దక్షి॑ణావంతో, అస్థు॒ర్యే, అ॑శ్వ॒దాః స॒హ తే సూర్యే᳚ణ । హి॒ర॒ణ్య॒దా, అ॑మృత॒త్వం భ॑జంతే వాసో॒దాః సో᳚మ॒ ప్ర తి॑రంత॒ ఆయుః॑ ||
(తై-సం) ఆప॑ ఉందంతు జీ॒వసే॑ దీర్ఘాయు॒త్వాయ॒ వర్చ॑సే ||
యస్త్వా᳚ హృ॒దా కీ॒రిణా॒ మన్య॑మా॒నోఽమ॑ర్త్యం॒ మర్త్యో॒ జోహ॑వీమి । జాత॑వేదో॒ యశో᳚ అ॒స్మాసు॑ ధేహి ప్ర॒జాభి॑రగ్నే, అమృత॒త్వమ॑శ్యాం ||
యస్మై॒ త్వం సు॒కృతే᳚ జాతవేద ఉ లో॒కమ॑గ్నే కృ॒ణవః॑ స్యో॒నం । అ॒శ్వినం॒ స పు॒త్రిణం᳚ వీ॒రవం᳚తం॒ గోమం᳚తం ర॒యిం న॑శతే స్వ॒స్తి ||
(తై-సం) సం త్వా॑ సించామి॒ యజు॑షా ప్ర॒జామాయు॒ర్ధనం॑ చ ||
(వ్రతనియమ తపః స్వాధ్యాయ క్రతు దమ దాన విశిష్టాః)
భో బ్రాహ్మణాః మనః సమాధీయతాం || విప్రాః || సమాహితమనసఃస్మః || యజమానః || ప్రసీదంతు భవంతః || విప్రాః ||| ప్రసన్నాఃస్మః ||
యజమానః ||
శాంతిరస్తు | పుష్టిరస్తు । తుష్టిరస్తు । వృద్ధిరస్తు | అవిఘ్నమస్తు | ఆయుష్యమస్తు | ఆరోగ్యమస్తు । శివంకర్మాస్తు। కర్మసమృద్ధిరస్తు | ధర్మసమృద్ధిరస్తు | వేదసమృద్ధిరస్తు। శాస్త్రసమృద్ధిరస్తు | పుత్ర సమృద్ధిరస్తు । ధనధాన్యసమృద్ధిరస్తు । ఇష్టసంపదస్తు || బహిర్దేశే సర్వారిష్ట నిరసనమస్తు | యత్పాపం తత్ప్రతిహతమస్తు। యచ్ర్ఛేయస్తదస్తు। ఉత్తరే కర్మణ్యవిఘ్నమస్తు | ఉత్తరోత్తర మహరహరభివృద్ధిరస్తు | ఉత్తరోత్తరాః క్రియాః శుభాః శోభనాః స్సంపద్యంతాం | ఇష్టాః కామాః సంపద్యంతాం | తిథికరణముహూర్త నక్షత్ర సంపదస్తు । తిథి కరణ మహూర్త నక్షత్ర గ్రహ లగ్నాధిదేవతాః ప్రియంతామ్ । తిథికరణే మహూర్తనక్షత్రే సగ్రహేసదైవతే ప్రీయేతామ్ । దుర్గాపాంచాల్యౌ ప్రీయేతామ్ । అగ్నిపురోగా విశ్వేదేవాః ప్రియంతాం | ఇంద్రపురోగా మరుద్గణాః ప్రియంతాం | బ్రహ్మ పురోగాః సర్వే వేదాః ప్రీయంతాం | శ్రీవిష్ణు పురోగాః సర్వేదేవాః ప్రియంతాం। మాహేశ్వరీ పురోగా ఉమా మాతరః ప్రియంతాం | వసిష్ఠ పురోగా ఋషిగణాః ప్రియంతాం | అరుంధతీ పురోగా ఏకపత్న్యః ప్రియంతాం | ఋషయ శ్ఛందాంస్యాచార్యా వేదా దేవా యజ్ఞా శ్చ ప్రియంతాం | బ్రహ్మచ బ్రాహ్మణాశ్చ ప్రియంతాం | శ్రీ సరస్వత్యౌ ప్రీయేతాం | శ్రద్ధామేధే ప్రీయేతాం | భగవతీ కాత్యాయనీ ప్రీయతాం | భగవతీ మాహేశ్వరీ ప్రీయతాం | భగవతీ పుష్టికరీ ప్రీయతాం | భగవతీ తుష్టికరీ ప్రీయతాం | భగవతీ ఋద్ధికరీ ప్రీయతాం | భగవతీ వృద్ధికరీ ప్రీయతాం | భగవంతౌ విఘ్నవినాయకౌ ప్రీయేతాం | భగవాన్స్వామీ మహాసేనః సపత్నీకః ససుతః సపార్షదః సర్వస్థానగతః ప్రీయతాం ! హరిహరహిరణ్యగర్భాః ప్రీయంతాం | సర్వా గ్రామదేవతాః ప్రీయంతాం। సర్వాః కులదేవతాః ప్రీయంతాం | సర్వావాస్తుదేవతాః ప్రియంతాం || బహిరపః || హతా బ్రహ్మ ద్విషః | హతాః పరిపంథినః | హతా అస్యకర్మణో విఘ్నకర్తారః | శత్రవః పరాభవం యాంతు । శామ్యంతుఘోరాణి । శామ్యంతు పాపాని । శామ్యం త్వీతయః | శుభాని వర్ధంతాం | శివా ఆపః సంతు | శివా ఋతవః సంతు| శివా అగ్నయః సంతు | శివా ఆహుతయః సంతు || శివా ఓషధయః సంతు | శివా వనస్పతయః సంతు | శివా అతిథయః సంతు | అహోరాత్రే శివే స్యాతామ్ ||
(తై-సం) నికా॒మే ని॑కామే నః ప॒ర్జన్యో॑ వర్షతు ఫ॒లిన్యో॑ న॒ ఓష॑ధయః పచ్యంతాం యోగక్షే॒మో నః॑ కల్పతాం|| శుక్రాంగారక బుధ బృహస్పతి శనైశ్చర రాహుకేతు సోమసహితా ఆదిత్యపురోగాః సర్వేగ్రహాః ప్రీయంతాం | భగవాన్నారాయణః ప్రీయతాం | భగవాన్ పర్జన్యః ప్రీయతాం | ప్రీయతాం భగవాన్స్వామీ మహాసేనః || పుణ్యాహకాలా వాచయిష్యే | వాచ్యతామితి విప్రాః |
ఉ॒ద్గా॒తేవ॑ శకునే॒ సామ॑ గాయసి బ్రహ్మపు॒త్ర ఇ॑వ॒ సవ॑నేషు శంససి । వృషే᳚వ వా॒జీ శిశు॑మతీర॒పీత్యా᳚ స॒ర్వతో᳚ నః శకునే భ॒ద్రమా వ॑ద వి॒శ్వతో᳚ నః శకునే॒ పుణ్య॒మా వ॑ద ||
యాజ్యయా యజతి ప్రత్తిర్వై యాజ్యాపుణ్యైవ లక్ష్మీః పుణ్యామేవ తల్లక్ష్మీం సంభావయతి పుణ్యాం లక్ష్మీం సంస్కురుతే ||
(తై-బ్రా) యత్పుణ్యం॒ నక్ష॑త్రం । తద్బట్ కు॑ర్వీతోపవ్యు॒షం । య॒దా వై సూర్య॑ ఉ॒దేతి॑ । అథ॒ నక్ష॑త్త్రం॒ నైతి॑ । యావ॑తి॒ తత్ర॒ సూఱ్యో॒ గచ్ఛే᳚త్ । యత్ర॑ జఘ॒న్యం॑ పశ్యే᳚త్ । తావ॑తి కుర్వీత యత్కా॒రీ స్యాత్ । పు॒ణ్యా॒హ ఏ॒వ కు॑రుతే ।
మహ్యం సహకుటుంబినే మహాజనా న్నమస్కుర్వాణాయ ఆశీర్వచనమ పేక్షమాణాయాద్య కరిష్యమాణాముక కర్మణః పుణ్యాహం భవంతో బ్రువంత్వితి త్రిర్వదేత్ ఓంపుణ్యాహమితి త్రిర్విప్రాః |
స్వ॒స్తయే᳚ వా॒యుముప॑ బ్రవామహై॒ సోమం᳚ స్వ॒స్తి భువ॑నస్య॒ యస్పతిః॑ । బృహ॒స్పతిం॒ సర్వ॑గణం స్వ॒స్తయే᳚ స్వ॒స్తయ॑ ఆది॒త్యాసో᳚ భవంతు నః ||
ఆదిత్య ఉదయనీయః పథ్యయైవేత స్స్వస్త్యా ప్రయన్తి పథ్యాం స్వస్తి మభ్యుద్యన్తి । స్వస్త్యేవేతః ప్రయన్తి స్వస్తుద్యన్తి స్వస్తుద్యన్తి ||
స్వ॒స్తి న॒ ఇంద్రో᳚ వృ॒ద్ధశ్ర॑వాః స్వ॒స్తి నః॑ పూ॒షా వి॒శ్వవే᳚దాః । స్వ॒స్తి న॒స్తార్క్ష్యో॒, అరి॑ష్టనేమిః స్వ॒స్తి నో॒ బృహ॒స్పతి॑ర్దధాతు ||
(తై-బ్రా) అ॒ష్టౌ దే॒వా వస॑వః సో॒మ్యాసః॑ । చత॑స్రో దే॒వీర॒జరాః॒ శ్రవి॑ష్ఠాః । తే య॒జ్ఞం పాం᳚తు॒ రజ॑సః ప॒రస్తా᳚త్ । సం॒వ॒థ్స॒రీణ॑మ॒మృతగ్గ్॑ స్వ॒స్తి ||
మహ్యమిత్యాది అముకకర్మణే స్వస్తిభవంతో బ్రువంత్వితి త్రిః | ఓం ఆయుష్మతే స్వస్తీతి ప్రతివచనం త్రిః ||
ఋ॒ధ్యామ॒ స్తోమం᳚ సను॒యామ॒ వాజ॒మా నో॒ మంత్రం᳚ స॒రథే॒హోప॑ యాతం । యశో॒ న ప॒క్వం మధు॒ గోష్వం॒తరా భూ॒తాంశో᳚ అ॒శ్వినోః॒ కామ॑మప్రాః ||
సర్వామృద్ధిమృధ్నుయామితి తం వై తేజసైవ పురస్తాత్పర్యభవ చ్ఛందోభిర్మధ్యతో ౽క్షరై రుపరిష్టాదాయత్ర్యా సర్వతో ద్వాదశాహం పరిభూయ సర్వామృద్ధి మార్ధ్నోత్సర్వా మృద్ధిమృధ్నోతి యఏవం వేద
(తై-బ్రా) ఋ॒ధ్యాస్మ॑ హ॒వ్యైర్నమ॑సోప॒సద్య॑ । మి॒త్రం దే॒వం మి॑త్ర॒ధేయం॑ నో అస్తు । అ॒నూ॒రా॒ధాన్, హ॒విషా॑ వ॒ర్ధయం॑తః । శ॒తం జీ॑వేమ శ॒రదః॒ సవీ॑రాః ।
(తై-బ్రా) త్రీణి॑త్రీణి॒ వై దే॒వానా॑మృ॒ద్ధాని॑ । త్రీణి॒ ఛందాꣳ॑సి । త్రీణి॒ సవ॑నాని । త్రయ॑ ఇ॒మే లో॒కాః || ఋ॒ద్ధ్యామే॒వ తద్వీ॒ర్య॑ ఏ॒షు లో॒కేషు॒ ప్రతి॑తిష్ఠతి ।
మహ్యమిత్యాది అస్య కర్మణః ఋద్ధిం భవంతో బ్రువంత్వితి త్రిః | ఓం ఋధ్యతామితి
ప్రతివచనం త్రిః ||
శ్రి॒యే జా॒తః శ్రి॒య ఆ నిరి॑యాయ॒ శ్రియం॒ వయో᳚ జరి॒తృభ్యో᳚ దధాతి । శ్రియం॒ వసా᳚నా, అమృత॒త్వమా᳚య॒న్ భవం᳚తి స॒త్యా స॑మి॒థా మి॒తద్రౌ᳚ ||
శ్రియ॑ ఏవైనం తచ్ఛ్రి॒యామా᳚దధా॒తి । సం॒త॒త॒మృ॒చా వ॑షట్కృ॒త్యం సంధ॑త్తం॒ సంధీ॑యతే ప్రజ॒యా ప॒శుభిః । య ఏ॑వం వే॒ద ॥
(శ్రియ ఏవైనం తచ్ర్ఛియామాదధాతి సంతతమృచా వషట్ కృత్యం సంతత్యై సంధీయతే ప్రజయా పశుభిర్య ఏవం వేద ।)
(తై-బ్రా) యస్మి॒న్బ్రహ్మా॒భ్యజ॑య॒థ్సర్వ॑మే॒తత్ । అ॒ముం చ॑ లో॒కమి॒దమూ॑ చ॒ సర్వం᳚ । తన్నో॒ నక్ష॑త్త్రమభి॒జిద్వి॒జిత్య॑ । శ్రియం॑ దధా॒త్వహృ॑ణీయమానం ।
(తై-బ్రా) అహే॑ బుధ్నియ॒ మంత్రం॑ మే గోపాయ । యమృష॑యస్త్రైవి॒దా వి॒దుః । ఋచః॒ సామా॑ని॒ యజూꣳ॑షి । సా హి శ్రీర॒మృతా॑ స॒తాం ||
ఏతైర్మంత్రైర్నీరాజనం కారయంతి ||| మహ్యమిత్యాది అముక కర్మణః శ్రీరస్త్వితి భవంతో బ్రువంత్వితి త్రిః || ఓం అస్తు శ్రీరితి త్రిర్విప్రాః || వర్షశతం పూర్ణమస్తు । గోత్రాభివృద్ధి రస్తు । కర్మాంగదేవతా ప్రీయతాం |
(అత్ర యత్కర్మోద్దేశ్యకం పుణ్యాహవాచనం తత్కర్మదేవతోహః కార్యః కర్మదేవతాశ్చ పుణ్యాహవాచనాంతే సంగృహీతాస్తత ఆలోచనీయాః।
వివాహస్యాగ్నిర్దేవతా తేన వివాహాంగభూత స్వస్తివాచనాద్యంతే కర్మాంగ - దేవతాగ్నిః ప్రీయతామితి వదేత్ || ఔపాసనేగ్నిసూర్యప్రజాపతయః స్థాలీపాకోగ్నిః గర్భాధానే బ్రహ్మా పుంసవనే ప్రజాపతిః సీమంతే ధాతా జాతకర్మణి మృత్యుః నామకర్మ నిష్క్రమణాన్నప్రాశనేషు సవితా చౌలే కేశినః ఉపనయనే ఇంద్రశ్రద్దామేధాః అంతే సుశ్రవాః పునరుపనయనేగ్నిః సమావర్తన స్యేంద్రః ఉపాకర్మణి ప్రతేషు చ సవితా వాస్తుహోమే వాస్తోష్పతిరంతే ప్రజాపతిః ఆగ్రయణే ఆగ్రయణదేవతాః సర్పబలేః సర్వాః తడాగాదీనాం వరుణః గ్రహయజ్ఞే నవగ్రహాః కూష్మాండహోమే చాంద్రాయణే అగ్న్యాధానే చాగ్న్యాదయః అగ్నిష్టోమస్యాగ్నిః అన్యేష్విష్టకర్మసు ప్రజాపతిరితి ||ఇతికర్మాంగదేవతాస్తత్రతత్రోహనీయాః|| )
శు॒క్రేభి॒రంగై॒ రజ॑ ఆతత॒న్వాన్ క్రతుం᳚ పునా॒నః క॒విభిః॑ ప॒విత్రైః᳚ । శో॒చిర్వసా᳚నః॒ పర్యాయు॑ర॒పాం శ్రియో᳚ మిమీతే బృహ॒తీరనూ᳚నాః ||
తదప్యేష శ్లోకోభిగీతో మరుతః పరివేష్టారో మరుత్తస్యావసన్ గృహే || ఆవిక్షితస్య కామమప్రేర్విశ్వేదేవాః సభాసద ఇతి ||
తత ఉత్తరకలశం దక్షిణహస్తే దక్షిణకలశం వామహస్తే గృహీత్వా తాభ్యాం ధారాద్వయం
సంతతం పాత్రే నిషించేదేభిర్మంత్రైః
||
వాస్తో᳚ష్పతే॒ ప్రతి॑ జానీహ్య॒స్మాన్ త్స్వా᳚వే॒శో, అ॑నమీ॒వో భ॑వా నః | యత్ త్వేమ॑హే॒ ప్రతి॒ తన్నో᳚ జుషస్వ॒ శం నో᳚ భవ ద్వి॒పదే॒ శం చతు॑ష్పదే ||
వాస్తో᳚ష్పతే ప్ర॒తర॑ణో న ఏధి గయ॒స్ఫానో॒ గోభి॒రశ్వే᳚భిరిందో | అ॒జరా᳚సస్తే స॒ఖ్యే స్యా᳚మ పి॒తేవ॑ పు॒త్రాన్ ప్రతి॑ నో జుషస్వ ||
వాస్తో᳚ష్పతే శ॒గ్మయా᳚ సం॒సదా᳚ తే సక్షీ॒మహి॑ ర॒ణ్వయా᳚ గాతు॒మత్యా᳚ | పా॒హి క్షేమ॑ ఉ॒త యోగే॒ వరం᳚ నో యూ॒యం పా᳚త స్వ॒స్తిభిః॒ సదా᳚ నః ||
అ॒మీ॒వ॒హా వా᳚స్తోష్పతే॒ విశ్వా᳚ రూ॒పాణ్యా᳚వి॒శన్ | సఖా᳚ సు॒శేవ॑ ఏధి నః ||
శివం శివం శివం ||
తతః కర్తుర్వామతః పత్నీముపవేశ్య పాత్రపాతిత జలేన పల్లవ దూర్వాభిగుదఙ్ముఖా- స్తిష్టంతో విప్రా అభిషించేయుః ||
స॒ము॒ద్రజ్యే᳚ష్ఠాః సలి॒లస్య॒ మధ్యా᳚త్ పునా॒నా యం॒త్యని॑విశమానాః । ఇంద్రో॒ యా వ॒జ్రీ వృ॑ష॒భో ర॒రాద॒ తా, ఆపో᳚ దే॒వీరి॒హ మామ॑వంతు ||
యా, ఆపో᳚ ది॒వ్యా, ఉ॒త వా॒ స్రవం᳚తి ఖ॒నిత్రి॑మా, ఉ॒త వా॒ యాః స్వ॑యం॒జాః । స॒ము॒ద్రార్థా॒ యాః శుచ॑యః పావ॒కాస్తా, ఆపో᳚ దే॒వీరి॒హ మామ॑వంతు ||
యాసాం॒ రాజా॒ వరు॑ణో॒ యాతి॒ మధ్యే᳚ సత్యానృ॒తే, అ॑వ॒పశ్యం॒జనా᳚నాం । మ॒ధు॒శ్చుతః॒ శుచ॑యో॒ యాః పా᳚వ॒కాస్తా, ఆపో᳚ దే॒వీరి॒హ మామ॑వంతు ||
యాసు॒ రాజా॒ వరు॑ణో॒ యాసు॒ సోమో॒ విశ్వే᳚ దే॒వా యాసూర్జం॒ మదం᳚తి । వై॒శ్వా॒న॒రో యాస్వ॒గ్నిః ప్రవి॑ష్ట॒స్తా, ఆపో᳚ దే॒వీరి॒హ మామ॑వంతు ||
త్రాయం᳚తామి॒హ దే॒వాస్త్రాయ॑తాం మ॒రుతాం᳚ గ॒ణః । త్రాయం᳚తాం॒ విశ్వా᳚ భూ॒తాని॒ యథా॒యమ॑ర॒పా, అస॑త్ ||
ఆప॒ ఇద్వా, ఉ॑ భేష॒జీరాపో᳚ అమీవ॒చాత॑నీః । ఆపః॒ సర్వ॑స్య భేష॒జీస్తాస్తే᳚ కృణ్వంతు భేష॒జం ||
హస్తా᳚భ్యాం॒ దశ॑శాఖాభ్యాం జి॒హ్వా వా॒చః పు॑రోగ॒వీ । అ॒నా॒మ॒యి॒త్నుభ్యాం᳚ త్వా॒ తాభ్యాం॒ త్వోప॑ స్పృశామసి ||
ఇ॒మా ఆపః॑ శి॒వత॑మా ఇ॒మాః స॒ర్వస్య॑ భేష॒జీః । ఇ॒మా రా॒ష్ట్రస్య॒ వర్ధ॑నీ రి॒మా రా॒ష్ట్రభృ॑తో॒ మృతాః᳚ ||
యాభి॒రింద్ర॑మ॒భ్యషీం᳚చత్ప్ర॒జాప॑తిః సోమం॒ రాజా᳚నం॒ వరు॑ణం॒ యమం॒ మనుం᳚ । తాభి॑ర॒ద్భిర॒భిషిం᳚చామి త్వామ॒హం రాజ్ఞాం॒ త్వమ॑ధిరా॒జో భ॑వే॒హ || మ॒హాంతం᳚ త్వా మ॒హీనాం᳚ స॒మ్రాజం᳚ చర్షణీ॒నాం । దే॒వీ జని॑త్ర్యజీజనద్భ॒ద్రా జని॑త్ర్యజీజనత్ । దే॒వస్య॑ త్వా సవి॒తుః ప్ర॑స॒వేశ్వినో᳚ర్బా॒హుభ్యాం᳚ పూ॒ష్ణో హ స్తా᳚భ్యామ॒గ్నేస్తేజ॑సా॒ సూర్య॑స్య వర్చ॒సేంద్ర॑స్యేంద్రి॒యేణా॒భిషిం᳚చామి । బ॒లా॒య॒ శ్రి॒యై య॒శసే᳚న్నాద్యాయ | ఓం భూర్భువస్స్వః | అమృతాభిషేకో౽స్తు | శాంతిః పుష్టిస్తుష్టిశ్చాస్తు || ద్విరాచామేత్ || ఇతి పుణ్యాహవాచనమ్ ||